Tuis | Nuus | Nuus | Moenie foto’s van verdagtes publiseer nie!

Die roekelose publikasie van foto’s van gearresteerde verdagtes en/of gesoekte persone op sosiale media, kan ernstige gevolge hę en lei tot dwarsboming van die gereg.

 

Lede van die publiek moet nie foto’s van verdagte misdadigers op sosiale media of die internet plaas nie.

Dit was die boodskap van die polisie na aanleiding van ’n voorval waarin skermfoto’s van CCTV-opnames van ’n vermeende motordief op sosiale media versprei is.

“Die voortdurende roekelose publikasie van foto’s van gearresteerde verdagtes en/of gesoekte persone, veral op sosiale media, kan ernstige gevolge hę,” het polisiewoordvoerder, Captain Daniel Mavimbela, gesę.

Mavimbela verwys na ’n onlangse saak waarin ’n man deur die howe vrygespreek is nadat hy aangevoer het dat sy skuldigbevinding gegrond is op ’n voorbeoordeelde identiteitsparade, aangesien sy foto’s voor die parade oor sosiale media gepubliseer was.

Mavimbela het gesę dat hierdie praktyk nie net die ondersoek van misdaad belemmer nie, maar dat die publiseerders van sulke foto’s krimineel vervolg kan word.

Volgens die SAPD Wet van 1995 mag niemand sonder die skriftelike toestemming van die nasionale of provinsiale kommissaris foto’s of sketse van persone wat vermoed word dat hulle ’n misdryf gepleeg het, publiseer nie.

Enige persoon wat sulke foto’s of sketse publiseer, is skuldig aan ’n misdryf en by skuldigbevinding strafbaar met ’n boete of met gevangenisstraf vir ’n tydperk van 12 maande.

Indien mense in besit is van foto’s of video grepe van verdagtes of misdaadtonele, moet hulle eerder met die SAPD oorleg pleeg voordat hulle op die web gepubliseer word, het Mavimbela gesę.